माजी आमदाराच्या कन्येचा अवघ्या दीडशे रुपयांत विवाह
राज्यात लग्नसराईत कोट्यवधी रुपयांची उधळपट्टी सुरू असताना, सोलापूरचे माजी शिक्षक आमदार दत्तात्रय सावंत यांनी समाजासमोर वेगळाच आदर्श ठेवला आहे. त्यांनी आपल्या कन्येचा विवाह नोंदणी पद्धतीने केवळ १५० रुपयांत पार पाडला.
कोणताही थाट-माट, खर्चिक समारंभ किंवा दिखावा न करता जिल्हा विवाह नोंदणी कार्यालयात अत्यंत साध्या पद्धतीने हा विवाह संपन्न झाला. सावंत यांची कन्या सुषमा आणि पाणीपुरवठा विभागातील शासकीय अभियंता शुभम शिंदे या दोन्ही उच्चशिक्षित वधू-वरांनी साधेपणाला प्राधान्य देत सहजीवनाची सुरुवात केली.
विशेष म्हणजे, विवाहात बडेजाव न करता वाचलेला खर्च विनाअनुदानित शिक्षकांच्या मुलांच्या शिक्षण व कल्याणासाठी देण्यात आला आहे.
या निर्णयामुळे राजकारणातही एक सकारात्मक व अनुकरणीय संदेश गेला आहे.
राज्यभरातून या विवाह सोहळ्याचे कौतुक होत असून, वाढत्या लग्नखर्चाच्या पार्श्वभूमीवर हा विवाह समाजाला विचार करायला लावणारा ठरत आहे.
दक्षता उपसंपादक:राजन क्षत्रिय
