डॉ.संपदा मुंडे यांच्या संशयास्पद मृत्यूने राज्यभर खळबळ; उच्चस्तरीय चौकशीची मागणी
बीड :
बीड जिल्ह्यातील मौजे कोठारबन (ता. वडवणी) येथील रहिवासी डॉ. संपदा मुंडे यांच्या दुर्दैवी व संशयास्पद मृत्यूमुळे संपूर्ण महाराष्ट्रात खळबळ उडाली आहे. फलटण येथे घडलेल्या या घटनेनंतर वैद्यकीय क्षेत्रात काम करणाऱ्या महिला डॉक्टरांच्या सुरक्षिततेचा प्रश्न गंभीरपणे पुढे आला आहे.
या प्रकरणात काही राजकीय पदाधिकारी आणि पोलिस अधिकाऱ्यांवर संशय व्यक्त होत असून, घटनेची सखोल चौकशी व्हावी, अशी राज्यभरातून मागणी होत आहे. बीड जिल्ह्यातही या घटनेचे तीव्र पडसाद उमटले असून, अनेक सामाजिक संघटना रस्त्यावर उतरून निषेध नोंदवत आहेत.
डॉ. संपदा मुंडे यांच्या मृत्यू प्रकरणाची उच्चस्तरीय चौकशी करून त्यांना न्याय मिळावा, या मागणीचे निवेदन आज आमदार विजयसिंह पंडित यांनी राज्याचे उपमुख्यमंत्री व बीड जिल्ह्याचे पालकमंत्री ना. अजितदादा पवार यांना सादर केले.
