मध्य रेल्वेची महत्त्वाची सूचना
सोलापूर उड्डाणपुलाच्या पाडकामामुळे १४ डिसेंबर रोजी ‘मेगाब्लॉक’
सोलापूर : सोलापूर रेल्वे स्थानक परिसरातील जुन्या उड्डाणपुलाचे (ROB) पाडकाम हाती घेण्यात येणार असल्याने मध्य रेल्वेच्या सोलापूर विभागात १४ डिसेंबर २०२५, रविवार रोजी तब्बल साडेबारा तासांचा (१२:३० तास) मेगाब्लॉक घोषित करण्यात आला आहे.
या कामामुळे सोलापूर विभागातून धावणाऱ्या ११ गाड्या पूर्णपणे रद्द करण्यात आल्या असून, ८ गाड्या वळवण्यात आल्या आहेत. प्रवाशांनी याची नोंद घेऊन सहकार्य करावे, असे आवाहन रेल्वे प्रशासनाने केले आहे.
११ गाड्या रद्द, शताब्दी एक्सप्रेसचा समावेश
१४ डिसेंबर (रविवार) रोजी मध्य रेल्वे सोलापूर यार्डातून धावणाऱ्या ११ गाड्या पूर्णपणे रद्द करण्यात आल्या आहेत. यामध्ये महत्त्वाची पुणे-सिकंदराबाद शताब्दी एक्सप्रेस (12025) देखील रद्द राहील.
| महत्त्वाच्या रद्द गाड्या (१४ डिसेंबर) |
|—|
| 12025 PUNE-SC SHATABDI |
| 11416/11415 HPT–SUR Express (दोन्ही दिशांना) |
| 11418 SUR–PUNE Express |
या गाड्या वळवल्या, काही KWV/KLBG पर्यंतच
मेगाब्लॉकमुळे वाहतूक सुरळीत ठेवण्यासाठी ८ गाड्यांच्या मार्गात बदल करण्यात आला आहे. तसेच, काही पॅसेंजर गाड्या त्यांच्या नियोजित स्थानकापूर्वीच थांबवण्यात येणार आहेत (शॉर्ट टर्मिनेशन).
* वळवलेल्या गाड्या: म्हैसूर-पंढरपूर एक्सप्रेस (16535/16536), टीव्हीसी-सीएसएमटी एक्सप्रेस (16332), एसबीसी-सीएसएमटी एक्सप्रेस (11302/11301) या गाड्या सोलापूरकडे न जाता वळवण्यात आलेल्या मार्गाने धावतील.
* प्रवासाची समाप्ती/सुरुवात: पुणे-सोलापूर एक्सप्रेस (12169) कुर्डुवाडी (KWV) पर्यंतच धावेल, तर सोलापूर-हासन एक्सप्रेस (11311) कलबुरगी (KLBG) येथून सुरू होईल.
कामाचे स्वरूप
हा ब्लॉक सोलापूर येथील रेल्वे ओव्हर ब्रीज (ROB) चे सुपर स्ट्रक्चर आणि सब स्ट्रक्चर तोडण्यासाठी घेण्यात आला आहे. कामाची सुरुवात १० डिसेंबरपासून तयारीच्या टप्प्याने होईल. १४ डिसेंबर रोजी मुख्य १२:३० तासांच्या ब्लॉकमध्ये क्रेनच्या साहाय्याने पुलाचे गर्डर उचलून हटवले जातील. या कामाची देखरेख ADEN/T/SUR, SSE (P-Way) आणि SSE (Spl. Works) यांच्या संयुक्त विद्यमाने केली जाणार आहे.
प्रवाशांना आवाहन
रेल्वे प्रशासनाने प्रवाशांना विनंती केली आहे की, त्यांनी १४ डिसेंबर रोजी प्रवास करण्यापूर्वी त्यांच्या गाडीची स्थिती निश्चितपणे तपासून घ्यावी. तसेच, ब्लॉक संपल्यानंतर ट्रॅक सुरक्षित असल्याची खात्री झाल्यावर पहिली गाडी फक्त १० KMPH च्या वेगाने चालवली जाईल. प्रवाशांनी रेल्वे प्रशासनाला सहकार्य करावे, असे आवाहन करण्यात आले आहे.
दक्षता उपसंपादक:राजन क्षत्रिय
