पक्षात फूट पडल्यावर महायुतीत सहभागी होणार्‍या राष्ट्रवादी काँग्रेस पक्षाचा 26 वा वर्धापन दिन बालेवाडी येथील शिवछत्रपती क्रीडासंकुलात जल्लोषात साजरा करण्याचा निर्णय घेण्यात आला आहे. येत्या 10 जूनला होणार्‍या या वर्धापन दिनाच्या सोहळ्यात जोरदार शक्तीप्रदर्शन करण्यात येणार आहे. यंदाच्या वर्धापन दिनाचा सोहळा भव्यदिव्य केला जाणार आहे, अशी माहिती पक्षाचे प्रदेशाध्यक्ष सुनील तटकरे यांनी दिली.
बालेवाडी येथे होणार्‍या कार्यक्रमस्थळाची सुनील तटकरे यांनी शुक्रवारी पाहणी केली. या वेळी त्यांनी छत्रपती शिवाजी महाराज यांच्या पुतळ्याला पुष्पहार अर्पण केला. त्यानंतर त्यांनी पत्रकारांशी संवाद साधला.
या वेळी त्यांनी वर्धापनदिनाच्या सोहळ्याची माहिती दिली. या प्रसंगी पक्षाच्या महिला आघाडी प्रदेशाध्यक्षा आणि राज्य महिला आयोगाच्या अध्यक्षा रूपाली चाकणकर, शिवाजी गर्जे, सुरेश घुले, पुणे शहर (पूर्व) विभागाचे अध्यक्ष सुनील टिंगरे, पश्चिम विभागाचे शहराध्यक्ष सुभाष जगताप, पिंपरी-चिंचवडचे शहराध्यक्ष योगेश बहल, माजी महापौर राजलक्ष्मी भोसले, पक्षाचे शहर कार्याध्यक्ष प्रदीप देशमुख यांच्यासह पदाधिकारी उपस्थित होते..
